Kaiako - Te Piinakitanga ki te Reo Kairangi (Kaupae 7)

Moo Maatou

He waananga e tuu whakahii ana i raro i te kaupapa Maaori, Kia Angitu Te Tauira te kaupapa matua e aratakina ana ia maatou mahi. Ko taa maatou tirohanga, He Takapau Maatauranga, He Whaanau Huarewa, kia tupu, kia hua, kia puawai ai ngaa uri whakatipu.

Ko ngaa tikanga, ngaa uara me ngaa maatauranga Maaori te tuuaapapa o a maatou whakaakoranga katoa, e whakarite ana kia whai mana, kia whai tikanga, kia whai kiko hoki te haerenga ako o ngaa tauira.

He waahi mahi e manaaki ana i te tangata, e poipoi ana i te whaanau, e whakanui ana hoki i te oranga tonutanga o te tangata me onaa hoa haere. Naa reira, ka whai hua ngaa kaimahi i te maha o ngaa tautoko hei whakakaha i te oranga o raatou me o raatou whaanau.

Ngaa Painga

• He inihua hauora, he inihua oranga kore utu hoki moo ngaa kaimahi tuuturu.
• E whaa ngaa raa whakataa aa-tau taapiri hei whakanui i a Matariki me te waa hararei.
• He kaupapa oranga whaanui e tuku ana i ngaa ratonga me ngaa kaupapa kore utu hei tautoko i te taha tinana, te taha hinengaro me te katoa o te oranga.
• He waahi tuuwaka kore utu kei te waahi mahi.

Moo Teenei Mahi

Waahi Mahi: Mangakootukutuku Campus, Kirikiriroa.

Haaora Mahi: 37.5 haaora i te wiki, he tuuranga tuuturu.

Hei Kaiako, ka tuu koe hei pou reo, hei pou tikanga, hei pou maatauranga moo ngaa tauira.

Ka:

• Whakatupu i te hiranga o Te Reo Maaori maa ngaa mahi whakaako rumaki e whai kiko ana, e whai wairua ana hoki.
• Aarahi i ngaa tauira kia taetae ki te tihi o te matatau reo, kia rere pai ai te reo i ngaa horopaki katoa.
• Whakaako i ngaa maatauranga o nehe me ngaa maatauranga o te ao hurihuri, kia noho toituu ai te reo me oona tikanga.
• Waihanga i ngaa wheako ako e whakawero ana i te hinengaro, e whakapakari ana i te reo, e whakaaraara ana hoki i te whakaaro Maaori.
• Tautoko i ngaa tauira maa te manaaki, te tohutohu me te whakakaha i too raatou maaia ki te tuu hei kaikoorero moo aapoopoo.
• Kawe i ngaa uara o te kaupapa Maaori kia rangona ai te whanaungatanga, te manaakitanga me te kotahitanga i roto i ngaa mahi katoa.
• Whai waahi atu ki te kaupapa nui whakaharahara o te whakaora, te whakauu, me te whakakaha ake i te reo Maaori.

Moou

E rapu ana maatou i teetahi tangata:

• E whai tohu ana i te Reo Maaori, i te Maatauranga Maaori e whakaakona ana maa te reo Maaori, i Te Panekiretanga o Te Reo raanei, he tohu, he puukenga taurite hoki e moohiotia whaanuitia ana.
• E puupuru ana i teetahi tohu Adult Teaching Kaupae 5, he tohu taurite raanei.
• Neke atu i te toru tau e whakaako ana i Te Reo Maaori, aa, neke atu hoki i te toru tau e whakaako ana i te hunga pakeke.
• E matatau ana ki Te Reo Maaori aa-waha, aa-tuhi hoki, aa, e aahei ana ki te aarahi, ki te tautoko, ki te whakawhanake i eetahi atu i roto i te ao reo Maaori.
• E mau ana ki ngaa maatauranga o te ao Maaori, ngaa tikanga Maaori, ngaa whakapapa, ngaa koorero tuku iho, ngaa tikanga aa-iwi me ngaa mita o te motu.
• E pakari ana ngaa puukenga whakahaere ako, whakawhanaungatanga me te whakaaweawe tauira, aa, e ngaakau nui ana ki te whakatupu tangata kia eke ai raatou ki ō raatou ake taumata angitu.
• E whakapono ana ko te reo Maaori te mauri ora o te iwi Maaori, ā, e hiahia ana ki te whai waahi ki te whakakaha me te whakarangatira i taua taonga tuku iho.

Kupu Whakakapi

Ki te whakapono koe he taonga tuku iho te reo Maaori, aa, e hiahia ana koe ki te whakatupu i ngaa ringa raupaa o aapoopoo hei kaitiaki moo taua taonga, kua tae te waa kia hoe tahi taatou.

Kua whati te tai, tono mai!

Position description Apply now

Share